Saturday, April 8, 2017

သင်္ကြန်ပွဲ (၁)

#သင်္ကြန်ပွဲ (၁)
ရေးသူ - ဒေါ်အောင်ဆန်းစုကြည်
မြန်မာပြည်က ဧပြီလရဲ့ရက်စက်မှုကတော့ နေရဲ့ ချစ်ချစ်တောက်အပူရှိန်နဲ့ ၀င်းဝင်းတောက်ထိန်နေတဲ့ အလင်းရောင်နဲ့ဆိုင်ပါတယ်။ လူတွေရဲ့ အင်အားတွေ၊ စွမ်းအားတွေကို ယုတ်လျော့အားနည်းစေတဲ့အတွက် ကွဲအက်နေတဲ့မြေကြီးပမာ တစ်ကိုယ်လုံးပူချစ်နေပြီး ပင်ပန်းနွမ်းနယ်စေ ပါတယ်။ ဒီလိုပူပြင်းခြောက်သွေ့တဲ့လမှာပဲ ကျွန်မတို့မြန်မာလူမျိုးတွေ ရဲ့ နှစ်သစ်အချိန်ကျရောက်ပါတယ်။ ပူပြင်းခြောက်သွေ့မှုနဲ့ လိုက်ဖက်ညီစွာပဲ နှစ်သစ်ကူးအခါသမယကို ရေသဘင်ပွဲခင်းပြီး ဆင်ယင်ကျင်းပကြပါတယ်။
ဒီပွဲတော်ရဲ့ နာမည်ကတော့ “သင်္ကြန်ပွဲတော်”ပါပဲ။ သင်္ကြန်ဆိုတာ ကူးပြောင်းခြင်းကို ဆိုလိုပါတယ်။ သင်္ကြန်မှာ မဟာ (ကြီးမြတ်သော) ဆိုတဲ့စကားလုံးကို တစ်ခါတစ်ရံ တွဲဖက်သုံးလေ့ရှိပါတယ်။ နှစ်ဟောင်း ကုန်လို့ နှစ်သစ်ကို ကူးပြောင်းတာဟာ ကြီးကျယ်တဲ့ပြောင်းလဲမှုဖြစ် တဲ့အတွက် ပွဲလမ်းသဘင်တွေ ဆင်ယင်ကျင်းပကြလို့ မဟာဆိုတဲ့ စကားလုံးကို သုံးတာ ဖြစ်ပါတယ်။ ဒါတင်မကပါဘူး။ ကျွန်မတို့တစ်တွေ “အတာ”(ပြီးဆုံးခြင်း)ဆိုတဲ့ စကားလုံးကိုလည်း သုံးပါတယ်။ ဘာဖြစ်လို့လဲဆိုတော့ ဒီပွဲတော်ဟာ နှစ်ဟောင်းရဲ့နောက်ဆုံးလေးရက် မှာကျင်းပပြီး အဲဒီမှာ အတာရေကို တစ်ယောက်နဲ့တစ်ယောက် အပြန်အလှန်ပက်ကြလောင်းကြပါတယ်။ ဒီလို အပြန်အလှန်ရေ ပက်လောင်းကြတာဟာ ငြိမ်းချမ်းတဲ့အထိမ်းအမှတ်၊ သာယာဝပြော တဲ့ အထိမ်းအမှတ်၊ အညစ်အကြေးတွေကို ဖယ်ရှားပစ်တဲ့ အထိမ်းအမှတ်ပါပဲ။
သင်္ကြန်ပွဲတော်ရဲ့ပုံသဏ္ဍာန်ဟာ လွန်ခဲ့သောနှစ်ပေါင်း(၂၀၀)ကျော်လောက် ကစပြီး သိသိသာသာပြောင်းလဲလာပါတယ်။ ၁၇၉၅ခုနှစ်မှာ အိန္ဒိယဘုရင်ခံ ကစေလွှတ်လို့ အင်းဝမှာ သံတမန်အဖြစ်ဆိုက်ရောက်ခဲ့တဲ့ အင်္ဂလိပ်လူမျိုး Captain Symes က သူဝင်ရောက်ဆင်နွှဲခဲ့ဖူးတဲ့ သင်္ကြန်ပွဲ ကို ရေးသားဖော်ပြဖူးပါတယ်။
နှစ်ဟောင်းက အညစ်အနွမ်းတွေကို သန့်စင်ဖယ်ရှားဖို့၊ နှစ်သစ်မှာ မကောင်းမှုတွေက ကင်းဝေးစေဖို့ အမျိုးသမီးတွေဟာ အဲဒီနေ့မှာ တွေ့သမျှ အမျိုးသားတွေကို ရေပက်ကြပါတယ်။ အမျိုးသားတွေကလည်း အပြန်အလှန်အနေနဲ့ သူတို့ကို ရေပက်ခွင့်ရပါတယ်။ ဒီလိုခွင့်ပြုတာဟာ တစ်ဖက်သားကို မထိခိုက်စေဘဲ ပျော်ရွှင်မှုကို များစွာဖြစ်ပေါ်စေပါတယ်။ အထူးသဖြင့် ရေဖလားတွေနဲ့ လမ်းတစ်လျှောက် တွေ့သမျှ အမျိုးသားတွေ ကို ရေပက်ကြတဲ့ အမျိုးသမီးငယ်လေးတွေဟာ သူတို့ကိုယ်တိုင်ပြန်ပြီး စိတ်နှလုံးထားကောင်းနဲ့ ရေပက်တာကို ခံရတဲ့အခါမှာ ပျော်ရွှင်ကြ ပါတယ်။
ဒီလိုရေပက်ကစားကြတဲ့အခါမှာရော၊ တခြားပျော်ရွှင်မှုတွေမှာရော၊ မယဉ်ကျေးတဲ့အမူအရာကို နည်းနည်းလေးမှ ထုတ်ဖော်မပြကြပါဘူး။ ညစ်ပတ်တဲ့ရေနဲ့ ဘယ်တော့မှ မပက်ကြပါဘူး။ အမျိုးသားအနေနဲ့ အမျိုးသမီးကို ကိုယ်ထိလက်ရောက် ကိုင်တွယ်ခွင့်မရှိပါဘူး။ ဒါပေမဲ့ သူစိတ်ကျေနပ်သလောက် ရေလောင်းခွင့်ရှိပါတယ်။ ဒါတောင် အမျိုးသမီးကစပြီး ရေလောင်းမှသာ ဖြစ်ပါတယ်။ အမျိုးသမီးတွေကို ယဉ်ကျေးသိမ်မွေ့စွာ ဆက်ဆံတဲ့ခေတ်တုန်းက အမျိုးသမီးတွေက သာ စပြီး ရေလောင်းခွင့်ရှိတယ်ဆိုတာ ယခုအခါမှာတော့ ပျောက်ကွယ်သွားတာ ကြာပါပြီ။
ဒီကနေ့မှာတော့ ရေအားပြင်းပြင်းထွက်ဖို့ ရေပိုက်တွေမှာ
ခေါင်းသေးသေးလေးတွေတပ်ပြီး ပက်ကစားကြတာတွေ ဟာ ရေပြွတ်တွေ၊ ရေဖလားတွေနဲ့ ပက်ကစားကြတဲ့နေရာတွေမှာ အများကြီးအစားထိုးဝင်ရောက်နေပါပြီ။ သက်ကြီးရွယ်အို မြန်မာလူကြီးများက သင်္ကြန်ပွဲတော်ကာလမှာ မယဉ်ကျေးတဲ့အမူအရာကို နည်းနည်းလေးမှ ထုတ်ဖော်မပြရဘူးဆိုတဲ့စကားဟာ လုံးဝမရှိတော့ဘူးဆိုတာကို ၀မ်းနည်းစွာနဲ့ ပြောဆိုနေကြပါပြီ။ အထူးသဖြင့် အလွန်အကျွံ အရက်သောက်သုံးခြင်းဟာ သင်္ကြန်ပွဲနဲ့အတူ တွဲဖက်ပါလာကတည်းကပါပဲ။ ယခုခေတ်မှာတော့ လမ်းထောင့်တွေမှာ ယာယီမဏ္ဍပ်တွေ ထိုးပြီး ရေပက်ကစားကြ၊ အဆိုအကတွေနဲ့ ဖျော်ဖြေတင်ဆက်လာကြပါပြီ။ ကားတစ်စီးအပြည့်နဲ့ အပျော်ရေပက်ခံထွက်ကြတဲ့သူတွေကလည်း တစ်လမ်းဝင်တစ်လမ်းထွက်နဲ့ ရေစိုရွှဲပြီးရင်း စိုရွှဲလာကြသလို၊ တချို့ကျတော့ မူးပြီးရင်း ပိုမူးလာကြပါတော့တယ်။
သင်္ကြန်ပွဲအတွင်း ရေပက်ခံထွက်တဲ့သူ အများအပြားဟာ ပျော်ရွှင်ဖို့အတွက် ကားနဲ့လျှောက်လည်ရင်း လွတ်လွတ်လပ်လပ်ကြီး အရက်သောက်ခဲ့ကြတာ ထင်ရှားပါတယ်။ ဒီလို အရက်မူးပြီး အပျော်ထွက်လည်တဲ့သူတွေဟာ တစ်ခါတလေ ဒေါသထွက်အောင် ပြောဆိုတာတွေ၊ ရိုင်းစိုင်းကြမ်းတမ်းတဲ့ အပြုအမူတွေ ပြုလုပ်လာတဲ့အခါ ရန်ဖြစ်ကြပါတယ်။ နှစ်သစ်အခါသမယ မှာ စောင့်ထိန်းရမယ့် ရိုးရာအစဉ်အလာစိတ်ဓာတ်ဖြစ် တဲ့ ဒေါသမထွက်ရဘူးဆိုတဲ့ စိတ်ဓာတ်ကို မထိန်းသိမ်းနိုင်ကြတော့ပါဘူး။
အပျော်လွန်တဲ့အခါ ရှောင်လွှဲလို့မရတဲ့ ရန်ပွဲတွေဖြစ်ရုံမက မတော်တဆ ယာဉ်တိုက်မှုတွေ ဖြစ်ပွားပြီး အသက်ဆုံးရှုံး၊ ခြေလက်တွေကျိုးပဲ့၊ ထိခိုက်ဒဏ်ရာ ရတဲ့အထိ ဖြစ်တာတွေဟာ နှစ်တိုင်းပါပဲ။
ဒေါ်အောင်ဆန်းစုကြည်
Eternal Light Magazine

No comments: